La Konferenco okazos en Svislando, en la urboj Neuchâtel kaj La Chaux-de-Fonds, de la 13-a ĝis la 16-a de majo 2015.
Partoprenantoj el ekster Svislando povas surloke pagi sian kolokvo-kotizon.
La registaro de la Respubliko kaj Kantono de Neuchâtel invitis ĉiujn registarojn de la mondo sendi iun personon aŭ iun raporton al tiu kolokvo.
ILEI (la Internacia Ligo de Esperanto Instruistoj) estas la organizanto.
Formiĝis Honora Komitato el 31 personecoj el Svislando kaj el la Esperanto-movado, kiu donas moralan subtenon al la evento.
Prelegos 12 fakuloj el 10 landoj.
Historia enkonduko
La unua tia Konferenco okazis en Ĝenevo en 1922, la dua okazis en Prago en 1927. La Konferenco de 2015 estos la tria.
Celoj
- Kolekti prezenton de la nuntempaj metodoj uzataj por lerni.
- Kolekti prezenton de la nuntempaj metodoj uzataj por instrui.
- Agnoskoj de Eo en la diversaj instrusistemoj, diplomigo pri Eo, estontaj paŝoj por evoluigi kaj firmigi tiun aspekton.
- Instruista trejnado : kiel plibonigi ĝin kaj diplomigi novajn instruistojn.
- Kolekti rezultojn kaj observojn pri konsekvencoj de la lernado de Esperanto (lernhelpa efiko) ilo al enkonduko por lingvoinstruado.
- Kolekti rezultojn kaj observojn pri konsekvencoj de la lernado de Esperanto kiel elemento en politiko de multlingvismo. Evoluigi strategiojn ĉirilate.
- Kolekti rezultojn kaj observojn pri konsekvencoj de la lernado de Esperanto en la kampoj de psikologio, akiro de interkulturaj kapabloj, solidareco, toleremo, malfermi la mondon al infanoj.
- Kiel kaj kiom Eo povas kontribui al la jarmilaj celoj de Unesko kaj UN en la kampoj de alfabetigo kaj daŭripova evoluo?
- Diversaj pedagogimovadoj (Freinet kaj aliaj) en rilato kun Eo.
- Interŝanĝo de spertoj.
- Renkontiĝo kun lokaj fakuloj.
Laborlingvoj
Profesiaj interpretistoj tradukos per samtempa interpretado ESPERANTO - FRANCA en ambau direktoj. Ni akceptas tamen kontribuojn en aliaj lingvoj kondiĉe, ke la preleganto zorgas pri la traduko al unu el la du lingvoj.
